Дебарца го одбележа патрониот празник

Со низа свечености се одбележа денот на Општина Дебрца. Чествувањето започна со полагање цвеќе во село Црвена Вода на спомен обележјето на Манифестот на генералштабот на НОВ и ПОМ, потоа во салата на Основното училиште во Белчишта, пред присутните гости, со поздравен говор се обрати Градоначалникот Игор Трајкоски, a потоа следеа настапи на учениците од Основното училиште “Дебрца”.

 

Интегрален текст од обраќањето на Градоначалникот

Почитувани борци, почитувани пријатели, ученици и наставници од ОУ „Дебрца“, почитувани гости и почитувани Дебрчани!

Ми причинува големо зaдоволство и чест што заедно со Вас го прославуваме овој наш Патронен празник, Денот на Oпштина Дебрца, Денот на донесувањето на Манифестот на Генералштабот на НОВ и ПОМ , Трети Oктомври 1943 година, ден кој значи вовед во една силна и победоносна борба не само за слобода, туку и за достоинство, за подобар живот на идните поколенија!

Трети Oктомври не е важен само за Дебрца, туку и за Македонија, бидејќи тогаш се обединува народот со повик да се вклучи во ослободувањето на својата земја. Дебрца е поим за слободарски дух, за јунаштво и саможртва во интерес на сите, поим за неисцрпна енергија што води кон победа.

Манифестот на Генералштабот на НОВ и ПОМ од трети октомври 1943, во с.Црвeна Вода, орловското гнездо на Караорман, има програмски карактер за понатамошниот тек и организација на антифашистичката борба на македонскиот народ, повикувајќи ги не само Македониците, туку и другите етнички заедници кои секогаш биле неизоставен дел од овој крај. Пожртвуваноста на оние кои се борат за правда, слобода и неизвесност се гледа во тие нивни обиди да не прават разлики, дискриминации и поделби, туку да зближуваат и обединуваат .

Политичкиот комесар Цветко Узуновски, командантот Михајло Апостолоски, членовите на Штабот: Методија Андонов Ченто, Хамди Дема, Страхил Гигов, Венко Марковски, Петре Пирузе- Мајски, Елисие Поповски, Кузман Јосифовски – Питу и Никола Минчев се основоположници и потписници на иницијативата да се обедини војската и народот, да се стави крај на фашизмот, злото кое однесе премногу животи. Нивните имиња и денес се светилници кои ни го покажуваат вистинскиот пат, патот на нашата суверена и независна Македонија, онаа која некои од нив само ја замислувале, во мигот кога го полагале највредното пред нејзината големина – животот. Затоа, во име на сите тие згаснати животи мора нашите и идните да ги направиме вредни за живеење.

Особено ние, Дебрчани, сме горди на нашето минато, на нашите вечни слободарски идеали со кои и денес чекориме, обидувајќи се да и дадеме нова смисла и димензија на Дебрца, на обидите нашите поколенија, задоени со вербата и верата во Македонија како единствена родина, да имаат подобар и посигурен живот.

Уште еднаш сакам да Ви се заблагодарам што со Вашето присуство ја збогативте нашата прослава!

Social profiles

Охрид

Струга

Вевчани